كوبي باست من قصتي كنت بحيكها لزمايلي في جروب الفيس بوك تطبيقات قوة الكلمة والتفكير
حبيت احكي قصتي من تاني بس المرة دي لحد مانا بكلمكم دلوقتي فمضطر احكيها من الاول :
#قصتي_ج1
سلام عليكم ازيكم يا شباب :
كنت سبق واتكلمت عن جزء من تفاصيل قصة حياتي قبل الكورس الخاص بقوة الكلمة والتفكير وبعده
واللي ميعرفش انا كنت ببساطة شخص كثير الاجتهاد حاولت في مجال كورة القدم ومتوفقتش ثم مجال الكلية اني اجيب تقدير كل سنة ويحصل تحدي من دكتور معين يقلل تقديري ويتسبب في اني مخشش نايبة او اتعين في الجامعة
ثم شاركت في ثورة يناير ثم دخلت الجيش ثم خرجت على مهنة المحاماه ولكل عنوان من دول تفاصيل مسيري هحكي عنها كتير
لكن كانت المحاماه وارهاقها وتعبها في بلد للاسف مفيش فيه احترام العلم ولا القانون والقانون علم راقي يحتاج تطور علمي ويحتاج احترام دلوة ومجتمع
وللاسف الاتنين في مصر مش موجودين – حط كمان الظروف الاقتصادية العامة كل دا كان بيقول جوايا انا ضايع انا مرهق بدنيا ونفسيا جدا انا مش هقدر اعمل حاجة في البلد ولا برة البلد نظرا لان الحالة العالمية كمان مش حلوة
اكيد مش هعرف اتجوز – جريت كتير في الدنيا وانا احمل شعور اني من المؤمنين القابضين على الجمر وان دا قدري وعلى ان اتعس في الدنيا حتى اصل للاخرة وانعم في الجنة
دخلت في تجربة خطوبة وكانت غير موفقة على الاطلاق والحقيقة مكنتش مقتنع بالخطوة اوي تحديدا مكنتش فرحان لكن مش زعلان يعني ببساطة مكنتش متحمس كنت داخل الجوازة وانا كالمؤدي للواجب – ولتفاصيل كتيرة مرتحتش لانها تفاصيل غير مرضية لي من البداية – وفسخت
وعلى الرغم من اني واخد قرار الفسخ الا اني تالمت كثيرا وهكون صريح لشعور قوي باني انسان مستقيم وانه هيتعذر عليا الجواز قريبا
كانت عنيا مبتشوفش الا كل اسود في واقع مصر والعرب والعالم الارهاب والدمار والحروب والمكايد – شفت الازمات الاقتصادية على مستوى الكوكب كله – شفت حالة عجز عام – شفت حالة تفشي لكل ما هو حرام – وفي وسط كل الشعور العام بيطلع شعورك الخاص بانك ملكش مستقبل وانك هتعاني دايما مشاعر العجز والاحتياج والضعف
الحقيقة نسيت اقولكم اني من 2006 لحد 2016 كنت شديد الاهتمام بالتنمية البشرية وكنت بطبق منها حاجات كتيرة من اول دكتور ابراهيم الفقي لتوني روبنز وبراين تريسي ولس براون واضح من كلامي اني مسمعتش لحد عربي الا ابراهيم الفقي لان مكنتش واثق في غيره من نصابين العرب في التنمية البشرية (كنت لما بشوف دكتور احمد عمارة كنت بقلب لانه شعره اسود يعني شاب فقلت تلاقيه نصاب – قناعة سيئة للاسف )
المهم بقول دا لاني لما ركزت مع التنمية البشرية كنت بحقق سعي عالي جدا ونتائج عاليه جدا ( يعني انا كنت رياضاي حتى لو ببطل برجع الجيم تاني – وكنت بقدر في كلية الحقوق دايما – وكنت بخطط لحياتي وكنت مميز في حاجات كتير- واخدت الماجستير بدري- وكنت واضح اني شاطر في القانون المحاماه بدري – الخ )
ومع كوووووول دا ولا انجاز من دول كان وراه الا الاحساس بالتعب الشديد والارهاق الشديد
تقدروا تقولوا ببساطة :
اني كنت مختلف عن اللي قاعد فاشل على القهوة – اني صاحب اهتمام بالتنمية البشرية ثم تخطيط وتطبيق وتنفيذ وسعي ونتايج كمان
بس عارفين انا كنت زيهم بالظبط – كنت تعبان زيهم ومرهق نفسيا زيهم وبشعر بنفس مشاعرهم الشخصية لا امل في المستقبل ولا في شغل ولا جواز ولا حياة وعلم الخ
ارجع بيكوا لما فسخت خطوبتي في اخر 2016
حسيت في اللحظة دي اني غير قادر على المحاولة او السعي في اي شئ ( كنت بعيط لوحدي كتير لما بوصل في التفكير لنقطة ان اصحابي لما كانوا بيقولوا مفيش امل في اي حاجة كنت بقول لا يمكن ان السعي ميوصلش )
انا الان نموذج للي سعى ومرتاحش ولا عايش بامان ولا سعيد
في اللحظة دي دفنت نفسي في البيت – وزعت الكام قضية اللي عندي على زمايلي – كنت بنام طول النهار واصحى طول الليل لاني كنت عصبي ومش عايز اكلم حد فعليا
وقتها انا فاكر اني كنت بتخنق بليل واحس بتشويك في راسي ورقبتي وصدري وظهري وساعات رجلي
كنت حاسس اني مسلوب مضغوط مخنوق ضيق مش عارف اروح فين بجد
في لفظ كان هو الوحيد اللي على لساني (( انا فاقد طعم اي حاجة ))
مفيش اي حاجة في الدنيا ليها طعم في عنيا
وكانت صور الماضي بتهاجمني بشراسة ( صور سلبية عن مشاكل حياتك عن ظلم تتعرض له عن مشاعر احتياج جنسي – افكار حرام تيجي في دماغي زي اني محامي وشاطر واقدر امسك قضايا مش كويسة واخد اتعابي فلوس كتيرة وحريم وسلطة وكل اللي عندي من مشاكل هيروح كنت بعيط عند النقطة دي لاني انا عارف اني طاهر حتى لو جربت اقرب من الحرام مش هعرف مبحبوش وحش ريحته وحشة انا مش شبه الناس دي )
جربت في الفترة دي اسمع فيديوز تنمية بشرية زي زمان جايز اخرج من حالتي مقولكوش على درجة النرفزة وانا بطفي الفيديوز دي
طبعا اتقالي انت محسود ومعمولك مش عارف ايه ولو ان بيتنا اكمنه متعلم مكتروش في الكلام دا كتير – وانا اصلا كنت بتحاشى الناس كلها
#التغيير :
يوم بفتح اليوتيوب شفت فيديو له عن محاضرة اسمها الوان الحياة مكتبة اسكندرية – وبردو مترسمش لربنا الطريق – بدات اسمع فيها كلام لفت انتباهي بس لسه برده تعبان
لحد ما يوم شفت اعلان كورس قوة الكلمة والتفكير ((( ارجو من دكتور احمد عمارة انه يرجع الاعلان الاول لانه اكثر تاثيرا من الاعلان الحالي بمراحل ))))
الاعلان قال لو انت حاسس ان الدنيا ظلم – وان طريق الحرام اسهل – وان الحياة جحيم للي ماشي صح – وان مفيش امل – الخ الخ الكورس دا هيغيرلك حياتك
(( ملحوظة : اانا متعود على ان اسامي الكورسات تكون غير حياتك ايقظ قواك الخفية حاجاة محفزة – لكن دكتور احمد بيقول كورس قة الكلمة والتفكير كانه اسم علمي غير حفاز ليا خالص ))
وعشان كدا كنت محتار اسم الكورس مخدنيش حسيته ملوش علاقة بحالتي
لكن الاعلان كلامه كله عن حالتي
هنا احب اسجل اني طووول اهتمامي بالتنمية البشرية اشتري كتب اه لكن عمري محضرت كورس برايفت مدفوع الاجر
قررت استخير بعد الفجر ( بالمناسبة دا الوقت الوحيد فعليا اللي كنت برتاح فيه وبعرف محسش بالمشاعر والاعراض اللي حكيت عليها )
استخرت وخلصت
اجيب فلوس الكورس منين ؟
كان من ضمن سعي الشديد والغير موفق اني كنت سبق وكنت طبقت كورسات تنمية بشرية في حسن التخطيط والابداع وطرقت ليا فكرة اني اشرح قانون في صورة فيديوز للطلبة وكنت فاكر اني هكسر الدنيا لانها فكرة جديدة من نوعها وبوصل للطالب في بيته في مكانه والوسيلة دي هتوفر عليا فلوس حوالي 100 الف جنية لو انا عايز انزل سوق الكورسات لازم ارشهم دعاية وسنترز وشغل كبير اوي عشان الطلبة تعرفني لان السوق مشتعل جدا
المهم ان كانت تجربتي مبتحققش نجاح كبير على قد التكلفة الرهيبة جهد وفلوس ونفسية
بقولكوا كل سعي ليا كان بيبقى ممتاز بس دايما مفيش نتيجة – او نتيجة بعد مجهود شديد فالوصول مفيش فيه سعادة
في يوم جالي ولد واحد وكان قدراته بسيطة جدا ( اسمه محمد منتصر – شهرته عسلية )
انا بقول اسمه لان كل اسم من اسمائه كانت رد استخارة مبشرة وانا معرفش – انا مش بهزر – الولد دا جه على ايده الحمد والنصرة والحياة المعسلة الحلوة
جالي فيوم وقالي انا عايد اولى حقوق ولازم انجح السنة دي
( نستكمل القصة في بوست لاحق )
Malek Aboushama
#قصتي_ج2
المهم هو قالي عايز اخد عندك – طبعا هتقولي فرحت وقلت جت الفلوس
لا والله ياجماعة قلت انا في حالة نفسية سيئة ودا مش وضع للشرح كدا انا هاخد فلوس حرام – امي لطمت ابوس ايدك بلاش كدا
استخرت
قلت خلاص انا هاخد الفلوس واشتري الكورس واخلصه وان حاجة اتغيرت خير ان متغيرش حاجة خلاص هقول للواد مش هقدر اكمل معاك – ويبقى دين عليا ابقى اردهوله
خدت منه فلوس
طلعت على فودافون كاش دفعت حولولي
وقعدت تلت ايام يوميا بليل والناس نايمة اتفرج
اقدر اقول ان دا كان يوم ميلادي التاني
في الكورس عرفت ايه اللي كان ناقصني
انا كنت بلغة احمد عمارة عالي جدا في سعي الجسد
لكني كنت صفر في سعي النفس
لذلك كانت النتيجة فعلا اني محققش كتيييييييييير من اهدافي
او اني اوصل لبعض النجاحات بارهاق بدني ونفسي شديد التعب لدرجة اني محسش باي لذة عند الوصول
دا فعلا اللي كان حاصل عشان كدا كنت طبيعي اكون مفيش فرق بيني وبين اللي قاعد فاشل
اه صحيح انا ازيد عنه بالسعي الجسدي
لكني اتساوى معاه اني لا اسعى بنفسي – لا اؤمن بصفات الله كما اؤمن بوجوده – لا اؤمن بالخيال ولا ارى نفسي في لحظة الوصول للهدف
بسعى للنجاح وانا مؤمن بان لبلد ظلم – ومطلع ربنا من الموضوع من غير ماخد بالي
بسعى للنجاح وانا مؤمن زي الاجانب بالماديات بس – ومطلع الخيال والطاقة من الموضوع
احمد عمارة كان جديد ونفس الوقت بديهي – كان روعة كان بيكمل الناقص
هنا ليا وقفة :
الوقفة دي تخصني وتخص كل اللي بيسمعوا الكورس
انا كنت قبل احمد عمارة كنت بدات اسمع لواحد اسمه ديباك شوبرا امركي من اصل هندي بيتكلم عن الطاقة والتامل والخيال
ودا فرق معايا لما سمعت احمد عمارة
لما كان احمد عمارة بيقول اي فكرة مكنتش بعملها ورقة وقلم وبس
لاااااا انا كنت بسجلها بصوتي وبعمل لنفسي تمريني انا واستعملت ادائه وتون صوته الهادي وسجلت لنفسي
انا اعتقد ان دا كان فعال جدا في تطبيقي وحصولي على نتايج زي ما هشرح
لكن بقول دا برده عشان انا ملاحظ ان في ناس بتسمع الكورسات اكتر ما بتطبقها وبتتاثر بيها بسيط جدا – زي اللي بيشم ريحة عطر بس سريع التطاير
انتوا محتاجين تغرسوا احلامكم جواكم – زي ما هقولكوا دلوقتي
المهم سمعت الكورس وعرفت ان سعي النفس 99% وسعي الجسد 1%
قلت سعي النفس= جلسات تامل وخيال
بجانب سعي الجسد بتاعي
وعنها يا معلم عارفين اللي استحلاها
اول هدف واقرب هدف كان الكورسات كانت اخر 2016 وامتحانات الترم الاول حقوقو على الابواب هنا قلت انا سبق وعملت فيديوز ودا كان سعي جسدي سليم
لكني مكنتش بعمل سعي النفس – توكل على الله
رحت مسجل لنفسي اوديو على الموابيل – خد نفس عميق وطلع بهدوووء شوف نفسك وانت بتسجل الفيديو وطالع فيه شكلك جميل ولابس بدلة زي الدكاترة ونفس الوقت نجم وانت فورمة في الكلام وحاسس بسعادة رهيبة وانت بتشرح
واستعشر ان عدد مهول من الطلبة بيسمعك من شااشات اجهزتهم وهما مش مصدقين نفسهم انك بتسهل لهم مهمة الامتحان بالطريقة دي
المهم الحلم كان طويل ومليان ( صور ومشاعر )
قعدت كل يوم 40 يوم مع ان الدكتور قال ممكن 19 يوم انا اتجننت بيه وجريت على التطبيق بكل قوة وحماس – كنت عطشان يا جماعة – ولما صدقت افهم ان الله زي منا مؤمن انه موجود ارمن انه كريم رحيم اه جايز يكون كل اللي حواليا من واقع سئ لكن هوا ادانا قانون اهو ( اسعى سعي نفس بالخيال وانت موقن فيا + سعي جسدك السهل ) هتلاقيني كاله للكون بديلك نتيجة عملك بعيد عن كووول الناس
اقكلو على حاجة بعد ما عرفت احمد عمارة حسيت زي ما يكون اني عايش مع الناس بس نفس الوقت مش عايش معاهم
اللي ساري عليهم معتش ساري عليا
وهو فعلا قال ( لا يضركم من ضل اذا اهتديتهم ) دي مش مجرد ايه دي شعار اللي في الوعي والهداية بيسري عليهم قانون ودنيا تانية بعيدة عن الناس التانية
فعلا ( اكثر الناس لا يعلمون لا يفقهون لا يعقلون لا يسمعون ) زي ما القران قال
الناس دي ليها قانون وانا قبل الكورس كنت ماشي معاهم وفقه
ودلوقتي
انا ماشي وفق قانون اخر
المهم اقسم بالله يا جماعة اسجل الفيديو يوتيوب – واحطه على جروبات الفيس بوك ووالقي اقبال رهيب جنوني على الفيديو
شهرة رهيبة وتفاعل شديد على الفيديوز
وفي لحظة بقيت مستر مالك ابوشامة من اشهر مدرسي القانون في المنصورة
بالمناسبة في الكورس بتاع الدكتور كان من اجمل ما فرق معايا انه بسببه عرفني ان عملتي هي الشرح والتدريس اكتر شوية من المحاماه – انا زمان قبل مكنت هدخل حقوق كنت هبقى مدرس والحمد لله ربنا مشاني الطريق دا كله لانه اختار ليا الاحسن
لاني بدل ما كنت هشرح لطلبة صغيرة انا بسرح لطلبة كبيرة وانا بصهر علمي بالقانون مع خبرتي كمحامي فالعيال مبهورة ومبسوطة وبتتعلم علم مبتسمعوش من غيري حتى من دكاترة لانه غير ممارسين للمهنة
المهم موقفتش لحد هنا ومن 2016 لحد الان وانا في تطور اسمي الحمد لله بيكبر
لكن الجديد في القصة هو الجانب العاطفي
(( يتبع ))

#قصتي ج3
حابب قبل ما ادخل في الجانب العاطفي اللي هو محل هذا البوست
اني اقول ان من روائع نعم ربنا عليا بعد الكورس هو اني حصل تغييرات في البيت كتيرة هنقي منها اخويا ملاذ
كان عنده صداع دائم واتاريه طلع نفسي بامتياز وكان من الناس اللي عقله اتغير واقدر الخص اللي حصله ببساطة ولينا احنا كمان والله
جملة ابراهيم الفقي
(( التفكير بسيبب التركيز والتركيز بيسبب الاحاسيس والحاسيس بتسبب السلوك والسلوك بيسببالنتايج والنتايج واقعك – غير الفكرة يتغير واقع المفكر ))
وقد كان
وهو حاليا شريكي في شغلي لانه خريج قانون بردو واحنا الاتنين الحمد لله شغالين بقوة وبنطبق مش بس قوة الكلمة والتفكير دا احنا كمان بنطبق كورسات الدكتور الخاصة بثورة الاهداف وازاي بنحط الرسالة في شغلنا والقيمة وازاي بتحصل لينا معجزات في الشغل على الرغم من ضعف امكانياتنا الا اننا بس عشان بنتقن شغلنا ربنا بيعبت لنا الناس على الرغم من ضعف الامكنيات التسويقية – ودا كلام هنبقى نحكي عنه بعدين
بس حبيت اذكر دا لان اخويا جزء مهم في حياتي مينفعش انكر وجوده في قصتي
ــــــــــــ
بعد ما بدات احس بنفسي انطلقت وبدات ارجع تاني اعمل انشطة كتير في حياتي اقدر اقولكو اني عايز العب جيم اعمل جسات تخيل لجسمي كسعي نفس جنب التمرين نفسه كسعي جسد وجسمي اختلف والحمد لله ومسيري هبقى من شخص عادي لبدي بيلدر بس هحتاج وقت
ـــــــــــــ
الجانب العاطفي :
هنا قبل ما اتكلم انا بسجله لان دا الجانب اللي بعيشه وبسجله لسببين :
1- عشان اذكر نفسي باللي اتعلمته من احمد عمارة في الجانب العاطفي
2- عشان احيانا الناس بتحتاج تشوف تجربة وهي بتتعاش مش بعد لما اتعاشت
انا عملت تمرين شريك الحياة
علمت زي ما قال بالظبط
حطيت كل الصفات اللي انا عايزها – فعلا مفيش احلى من انك تعمل تمرينك على صفات صفات بدون ما تفكر في حد بعينه وانت بتعمله والا تبقى بتشتغل نفسك
حطيت كل الصفات اللي عايزها والحقيقة اني غلطت في الاول وحطيت الصافات اللي مش عايزها – مهما كنا في رواسب والبرمجة قديمة فالواحد بينسى – انا بقولكوا متنسوش تحطوا اللي انتوا عايزينة الصورة الحلوة يا جماعة انا عايزها مطيعة مش تقول انا مش عايزها عندية ( نحو – مش بعيدا عن ) المسالة دي خطيرة
عملت التمرين لمدة 21 يوم
وفي الترم التاني فعليا في اقل من 6 شهور مش 9 شهور زي ما قال لقيتها
بنت جميلة لطيفة دمها خفيف ورياضية ومؤدبة زي ما حلمت بيها
احب اقلوكوا اني اول ما شفتها كان انطباعي عنها انها قليلة الادب ومغرورة وشايفة نفسها يعني مش اول ما شفتها اتسحرت والجو دا اقسم بالله لا خالص – هو في اعجاب بيها كبنت بس صراحة لكن مش اكتر بل كمان هي اطول مني
وهنا حابب اسجل ان الصفات اللي بتكتبها بيبقى المطلوب تجيب 70 او 80% منها فلما تقابل الشخص دقق فيه لو طلعت النسبة دي افرح
الحقيقة اني بالتعامل لقيت فيها شروطي في الطباع ودا كان المذهل ثم جسديا وشكليا حتى صفات اهلها كانت مريحة جدا
اول درس : التعلق
بالتعامل لقيتها هي وبدات افرح بشدة انها هي
كان من ضمن التمرين انك لما تقابل شريك حياتك استخير عشان تظبط نفسك على طاقة الخير فان كان خيرا ربنا هيقربك وان كان شرا هيحصل تنافر طاقي
(( يتبع ))

ج 4 #قصتي
وانا بستخير كنت بستخير غلط كنت بستخير وانا متعلق جدا بيها
كنت بقول اللهم ان كنت تعلم انها خير لي في ديني ودنياي وعاقبة امري فاقدرها لي ويسرها لي ثم بارك لي فيها وان ترى العكس فاصرفها عني وصارفني عنها واقدر لي الخير اينما كان
كنت باجي في النص التاني والنبي يارب خليها تكون هي والنبي تكون هي
بالصدفة بقول الكلام دا قدام اخويا
قالي انت كدا بتبوظ الدنيا يبني انت كدا بتبوظ الاستخارة
(( هنا مكنتش طايق اقبل منه كلام – خدوا بالكم لما الحق يتقال لكم استجيبوا له بدري ))
ومع ذلك فكرت في كلامه قلت انا المفروض بفوض ربنا مش بتعلق بيها
هنا رحت رايح على فايل تمرين عدم التعلق في كورس قوة الكلمة والتفكير
هنا دا موقف صعب
لان طبعا انتوا عارفين فكرة التمرين فكون اني اعمله عليها هي كان شئ مضايقني لكني حلفت التزم الصح ايا كان بعد ما تعلمت من احمد عمارة
عملت التمرين اكتر من مرة ورا بعض عشان افك الارتباط شعوريا بيها وفضلت تصغر تصغر – ارجعوا للتمرين بقى للي مش فاكر
وهنا قلت بيتهيالي انا طاقتي محايدة وانا بستخير
وفعلا استخرت وانا فعلا سايب الموضوع لله تماما ومتقبل تماما فكرة انها تكون هي نصيبي والعكس
نمت صحيت حصل دردشة في البيت عليها الناس مبسوطة من كلامي عليها من الاخر زي ما بيقول الصالحين ( التيسير علامة الاذن )
حسيت باليسر كدا
جيت في حصة وخلصت ورحت قايلها عايزك في موضوع :
سؤال مباشر : انتي مرتبطة
هي استغربت : لا – ليه ؟
قلتلها : بصراحة معجب بيكي
اعتقد ان من حقي اقول ان من امتع لحظات حياتي ردود افعالها لانها كانت خجولة وسعيدة – بالمناسبة في تمرين كدا لدكتور احمد اسمه استشعار لحظات السعادة دا في تطبيقات قانون لجذب انا لما بستعيد لحظة عشان هرمون السعادة بفتكر الموقف دا
المهم قلتلها : بصي انا انسان مستقيم واحب ابقى على نور انا عايزك تعرفي اهلك اني قلتتك اني معجب بيكي لانك المفروض امانة عندي انا المدرس بتاعك فمن حقهم يعرفوا وانا عايزهم يعرفوا
اتفقنا ان محدش يحس بحاجة من الكورس طبعا – وانا احب اوجه لنفسي الشكر والتقدير على اني اتفاجئت بنفسي من درجة التمثيل المريعة طول السنة لدرجة ان محدش حس بحاجة
بليل كلمتها – قالتلي انها كلمت مامتها وان الكلام دا مش هينفع دلوقتي والكلام ممكن يكون اخر السنة – القصد طول الترم دا كان الكلام بينا حترام لكن نفس الوقت كانت المشاعر من نوع هادي بينمو واحدة واحدة مش والع زي الافلام
ودا اللي طمني وبقينا بنتعرف على بعض وبنضحك وكاننا صحاب
ولكن كان في هنا درس كبير خدوا بالكم منه :
في فيديو لدكتور احمد كان في برنامج عز الشباب كان بيقول فيه ان الحب شعور لكنه ارادي تقدر تتحكم فيه ومتطلعوش الا بتلت شروط
ان اللي قدامك يستاهل
انك جاد وقادر ماديا
ان الاهل موافقين
فمطلعش مشاعرك قبل دول لان ان طلعت مش هتقدر تتحكم فيها وان فشلت التجربة هيحصلك اعراض انسحاب الهريورين من الدم هتتالم نفسيا جدا
الحقيقة يا جماعة انا مشفتش الفيديو الا متاخر ومتاكدتش كويس من الشرط 2 و 3
فقط شرط رقم 1 ان اللي قدامي يستاهل هو اللي متحقق
الحقيقة ان اللي حصل اني كنت ناوي اخطبها في نهاية السنة واني مش مستعجل على الجواز لاني محتاج وقت عشان اقوي نفسي ماديا ومهنيا
خليت اهلي بعد الامتحانات يكلموا اهلها الا ان كان في رد مؤدب جدا لكنه حاسم بشكل اوفر البنت صغيرة ومش هينفع تتجوز وتحمل واوولاد دلوقتي – الفكرة مكنتش ضدها يا جماعة لكن اني ادور في الكلام على كلمة بخصوص المستقبل ان في امكانية او فوت علينا بكرة حتى – ابدا
هنا تعرضت لتجربة شديدة التعب والقسوة
في لحظة زي دي البرمجة المهببة بتاعتنا بتقول كلمات زي ( انتكاسة – انا بتحطم من تاني الخ ) كنت متالم جدا جدا جدا ومع ذلك رافض جدا جدا جدا اني اقع تاني
جه رمضان اللي فات وقررت اعتكف مدد طويلة عشان استعين بالطاقة النقية في رمضان وافكر واشوف هعمل ايه
هنا درس برده – عزلة عن عزلة تفرق في عزلة تكئب دي سلبية وعزلة الانبيا والصحابة والحكما عزلة طاقية لتنقية الطاقة والتفكير ومفيش مانع من التنفيس بالعياط بس بغرض التنفيس
المهم وقتها كان الالم سببه يا جماعه ببساطة:
اني سيبت مشاعري لبنت هيا كمان بتبادلني نفس المشاعر يعني لو كانت وحشة كان بيبقى المبرر موجود لنساينها لكن انا في الموقف دا
ومعاه ميت الف سؤال متملكش اجابته
وبعدين في جملة كدا على دماغي : طب يا احمد يا عمارة اعمل ايه في دي احنا مخدنهاش في الكلاس
كان المفروض اعتمد على نفسي واحاول استشف من كلام احمد عمارة ما يعين هنا
هنا قلت ادور له على حاجة بخصوص الحب
اقوم الاقي فيديو سيكولوجية الحب
وفي وسط كلامه الاقيه يقول (( حط سؤال وجاوب عليه – هل تقدر تستغنى عن حبيبك ؟ ان كان لا يبقى انت مش بتحبه – لكن لو تقدر تستغنى عن حبيبك يبقى دا حب طبيعي ))
وهنا تنحت
بس فهمت: بصوا يا جماعة
شريك الحياة او اي نعمه محتاجة فعلا سعي نفس وسعي جسد عشان تفعل قانون الجذب وتنجذب لك
لكن ما بعد الجذب لازم الواحد ميحصلوش تعلق – وفرح سلبي
مرضين مهببين
التعلق يعني الواحد بيربط السعادة بالنعمة دي بس – ودي كارثة لان التعلق بيفسد الحب وبيحوله لمرض وياما النعمه بتزول ياما النعمة بتيجي وانت بتعلقك بتبوظها فبتبقى العلاقة عكس مانت كنت عمال بتتخيلها خالص
يعني التعلق بيطير النعمه ( بيبوظ عملية الجذب فعلا متفهمش في ايه الحكاية بتموت كدا) او بيجذبها بايظة ( تخيل تبقى متعلق بزيادة فتبقى ضعيف ونحنوح مش رومانسي – او تبقى متعلقة بزيادة فتبقي خنيقة مش رومانسية )
بردو المرض التاني هو الفرح السلبي : الفرح السلبي ان الواحد ينشغل بالنعمة عن المنعم ( دكتور احمد قال لو جبت لمراتك دهب راحت واخدها وسايباك وقاعده مع الدهب ايه شعورك هي كدا انشغلت عنك بيها ) والمفروض ان الوصال يزيد
هنا شريك الحياة او اي نعمة او هدف لازم منفرحش بيه فرحة اوفر لان الفرحة الاوفر بتنسينا ربنا فبتزول من وشنا او بتبوظ حلاوتها في ايدينا – نفس الحكاية
الحقيقة ان التعلق والفرح السلبي معناهم اننا فقرا وان طاقتنا طاقة احتياج وفقر
والحقيقة اني اكتشفت ان قبل ما اطلب اي نعمه صحيح بقى معايا بفضل الله قانون جذبها لكن المفروض يبقى معايا قانون الاستمتاع بيها صح
ودا عكس التعلق تماما وعكس الفرح السلبي تماما
هنا كان الهدف : ازاي اشيل التعلق ؟ ازاي ابقى مليان مش فقير ؟
طلعت ورقة وقلم وكتبت اجراءات اعملها :
1- اشتغل بتمرين عدم التعلق عليها مهما كان دا مؤلم بس اعمله بكثافة كل يوم علىفكرة في مرة عملته 10 مرات ورا بعض في جلسة واحدة يخلص اعيده يخلص اعيده
2- بدات اعالج افكاري واسمع عنالحب الصح لدكتور احمد عشان اظبط الفكرة والتركيز والمشاعر والاحاسيس
3- كدا انا اشتغلت على نفسي عقل واعي استماع لحلقات سيكولجية الحب – واشتغلت عقل لا واعي بالتامل بتاع عدم التعلق – في يوم ما هديت جدا
لحد ما حصلي حاجة كبيرة ومهمة وحلوة
كنت دايما اسمع احمد عمارة يقول المليان مش اللي محتاج طاقة هو اللي بيحب صح وبيستمتع وبيقدر اصلا يجذب الحب الخ
وشوية اسمعه يقولك اللي بيحب ربنا
هنا حطيت على ورقة نظريا ان لو الانسان حب ربنا هيبقى مملي بطاقة من المصدر الاساسي للطاقة الا وهو الله تجعله مليان غير محتاج فبيحب من منطلق الاضافة لا من منطلق الاحتياج فيحصل الجذب بسرعة وبقوة
وبكدا يبقى مش متعلق لانه كدا الله اكبر جواه مش النعمه هي اللي اكبر
وبكدا لما هيتجي النعمة مش هيفرح فرح سلبي بالبالعكس هيتنعم بيها ونفس الوقت يشكر فربنا يبارك له ويزيده
كل دا جميل
بس ازاي الواحد يحب ربنا – حب ربنا اكيد صعب ومش اي حد يعرف يعمل دا
((( قناعات هباب )))
المهم وانا بفكر رحت قايل ايه : هو مش ربنا قالنا ندعوه خلاص انا هفوضه في انه يعرفني الطريقة اللي احبه بيها
فالهمني ربي اقول : اللهم اني اعلم انك تحبني وتحب كل عبادك ولكني لا اعلم ان كنت اهلا لحبك ام لا – يارب اشكرك على حبك لي وافوضك في حبي لك
وفضل السؤال : ازاي الواحد يوصل لحب ربنا يقوم التعلق باي نعمه ومنها شريك الحياة يتشال ؟
في يوم بليل لقيت نفسي بقول هو حب ربنا ازاي اصلا ؟
انا لما هحب بنت همسك ايدها مثلا هحضنها في مصلحة مادية مشبعه في الموضوع لكن حب ربنا دا ازاي وايه الحلو اللي فيه ؟
وفي يوم سالت نفسي ؟ هو مش انا بحب حبيبتي ؟ اه طيب وانا مش متجوزها بحبها ولا لا ؟ اه بحبها ؟ ازاي وانا مش بمسك ايدها ولا بحضنها ؟ قلت اه في الوان تانية للحب زي اني بفرح اوي من مجرد خيالي او نيتي وانا بجيب لها ورد وبستمتع وانا بنفذ
هنا عقلي نور : ووجسمي قشعر : زي منا جسمي قشعر وعنيا بتدمع وانا بتكتب لكو دلوقتي
قلت لو شيلت حبيبتي وحطيت ربنا
يبقى ممكن اني استمتع باني اعمل لحبيبي حاجة تبسطة تفرحة تضحكه تزود حبه ليا
ومن مجرد النية بفرح ولما بنفذ بفرح ومع النتيجة بفرح
هوا دا الحب عموما
وهو دا حب الله
عرفت حب الله اازاي يا مالك الله اكبر
والله ما صعب والله العظيم ما صعب
دا قريب وجميل
ولك ان تتخيل وانت بتعمل صدقة نازل تعملها مش عشان الحسنات
عشان هو بيفرح وبينبسط منك لانك بتملها له محبه
بتعمل دا لجل خاطر حبيبك
هتشوف هعملك ايه يارب
فتتنافس مع حبيبك على رضاه
فيتنافس معاك على رضاك
دي حالة من يحب الله يبقى الحمد لله طاقته طاقة حب يبقى اتصل بالمصدر الاساسي للحب يبقى اتملى يبقى هيحب كل نعمة من خلال ربنا يبقى مش هيتعلق بنعمه
جالي الشيطان وقالي : بس دا معناه انك تحب ربنا اكتر من النعم فمش هتعرف تتلذذ بالنعمه ( قناعة كاذبة )
الحقيقة مين قال ان حب الله يتعارض مع جمال الدنيا
مين قال احبه فمحبش غيره
من قال اني احبه فاتقشف وابعد عن متع الدنيا الحلال
العكس دا حبه بيخليني اعرف اتمتع بمتع الدنيا بس الدنيا متملكنيش فمتعلقش بيها دا كل الموضوع
دا بحبه الجذب بيحصل
دا بحبه الفرح بيبقى ايجابي فبشكر فمتعته بتزيد
خلااااااااااااص وصلت اتمليت بحب الله ودلوقتي بعمل حاجات كتير لاجل الحب مش الحسنات ودلوقتي بتفرج على تطبيقات قانون الجذب
والدكتور قال فيه خطوات الجذب الناجح
حدد الهدف بدقة ( حصل )
عيش مشاعره يوميا ( حصل من ايام قوة الكلمة والتفكير )
انفصل عنه وتحرر منه ( اقضى على التعلق بيه )
عيش مشاعره في انشطة حواليك واشخاص حواليك
واخر نقطة دي هيا اللي كانت نقصاني :
انا حددت انها هدفي
وبعمل تامل يومي صوتي وانا بتجوزها
اما التعلق فربنا حله ليا بحبه من قبل كورس تطبيقات قانون الجذب ( مع الشكر لدكتور احمد لانه برده سبب في الوصول )
اخر خطوة : اسال نفسك لما هتوصل للهدف هتحس بايه ؟
اكتب مشاعر الهدف
سيبك من الهدف واكتب ايه اللي حواليك دلوقتي من انشطة واشخاص تعرف تحس معاه بنفس المشاعر
ان عشت المشاعر دي في حياتك الان فانت كدا تبقى عايش مشاعر الهدف تقوم تفعل قانون الجذب
احنا بنجذب اللي عايشينه مش اللي عايزينه
اتمنى اكون مفيد من ناحية
ومن ناحية تانية عايز اقول انا لسه في اخطاء في سيري ودا اخر ما اقول من دروس حتى الان
انا التعلق بيصيبني من حين لاخر وبنسى ربنا من حين لاخر ولحظات النسيان دي هي عدوي بس ادينا بنمرن الداخل زي ما بنمرن جسمنا لحد ما يطلع لينا عضلات نفسية مؤمنة وقوية
انا احيانا بتعب عشان البرمجة بتاعه التعلق كانت سنين
لكني افضل كثيرا كلما عدت لكورس الدكتور واستمعت اليه فاتذكر ثم اعيد المحاولة
اتمنوا لي التوفيق مهنيا وماديا وعاطفيا
اتمنى لكم التوفيق واخر ما انصح به لكم التزموا حرفيا بما يقوله هذا الرجل وتذكروا ان لم نكن في احسن حال ( انا السبب )
وان كنا في احسن حال ( انا السبب )
ربنا يعيني ويعنكم
سلام وامان ورحمة وبركات عليكم وعلى الدكتور احمد عمارة
سلام الله عليكم ورحمته وبركاته
#مالك_ابوشامة